2025 මාර්තු 28 දින ලොවම කම්පා කරමින් සිදුවූ භූ කම්පනයෙන් මියන්මාරය මහත් ව්‍යසනයකට මුහුණදෙනු ලැබුවා.
ලෝකයේ පවතින සීමිත බෞද්ධ රාජ්‍යයන් අතුරින් එකක් වන මියන්මාරය හා එහි ජනතාවත් මෙම ව්‍යසනය නිසා මේ මොහොත වන විටත් ඉමහත් පිඩාවට පත්ව සිටිනවා.
ලොව තාක්ෂණිකව කෙතරම් දියුණු වූවත් සොබාදහමේ ධර්මතාවයන්ට අනුව කටයුතු කළ යුතු බව මෙම ව්‍යසනය අප හට මනාව පෙන්වා දෙනවා.
විපතේදී අන්‍යයන්ට පිහිටවීමේ බුදු වදන පෙරටුව ථෙරවාදී බෞද්ධ ශික්ෂණයෙන් යුතු ශ්‍රී ලාංකේය ජනතාව නියෝජනය කරමින් මේ මොහොතේ මියන්මාර් රාජ්‍යයට දායකත්වය ලබාදීම අප සැමගේ ප්‍රමුඛ කාර්යයක් වෙනවා.
ඒ අනුව මෙම තත්ත්වය සලකා මල්වතු – අස්ගිරි උභය මහා විහාරීය අතිගෞරවාහ මහ නායක මාහිමිපාණන් වහන්සේලා සහ ශ්‍රී දළදා මාලිගාවේ දියවඩන නිලමේතුමා විසින් මියන්මාර් වැසියන්ගේ සුභ සිද්ධිය තකා ශ්‍රී දළදා මාලිගාව සහ මල්වතු- අස්ගිරි විහාරයන් මගින් රුපියල් ලක්ෂ 150ක මූල්‍ය දායකත්වයක් මියන්මාර් තානාපතිතුමිය වෙත ලබාදීමට තීරණය කර තිබෙනවා.
ඒ අනුව, 2025 අප්‍රේල් 2 දින සවස 4ට ශ්‍රීමත් දන්ත ධාතූන් වහන්සේ අභියසදී මල්වතු අස්ගිරි උභය විහාරයන්හි අනුනායක මාහිමිපාණන් වහන්සේලා මෙන්ම වින්සත් වර්ගික කාරක සභාවන්හි නායක ස්වාමීන් වහන්සේලා ඇතුළු ගරුතර මහා සංඝරත්නය විසින් මියන්මාර වැසියන්ට පිරිත් සජ්ඣායනය කර ආශිර්වාද කිරීමටත් මෙම ව්‍යසනයෙන් ජීවිත අහිමි වූ වැසියන්ට පින් අනුමෝදනා කිරීමත් සිදුවෙනවා.
© 2025 All Rights Reserved by Media Bureau of Sri Dalada Maligawa. | For site suggestions and errors, please contact feedback@sridaladamaligawa.lk
Web V. 4.98
